جيب الجديد wikileaks

توا تأكدت إلي الشعب التونسي أقوى شعب على وجه هذه البسيطة و كيما يقول المثل لا يفوتنا فايت لا خبز بايت !
الناس الكل تفجعت كيف خرجوا الويكليكس الاخبار السرية متاعهم واحنا هبطت علينا السكينة وقلنا بصوت واحد 

 ويكيليكس جيب الجديد !!!!!!

مل أخبار إلي قالوها :

قلك سي صخر أدامه الله ذخراً للوطن يلعب فالسبور وزيد يحب ينقص شوية كيلووات .
و أنا من موقعي المتواضع هذا انقلوا راك تقتل وكيما قالت مدام صوفية "ويهبل و يهبل !!"

قلك زادة راو شرا دار في البلفيدار تع كندا . 
والحقيقة فما سؤال حيرني برشة زعمة عندهم قرودة كيف البلفيدار متاعنا؟
 و حتى كان شرى يا خويا خلي يشري ; إما خير ولا يقعد فلكرى غادي.

تي كان الكرى في تونس غالي ملا كندا كيفاش ; عادا يولي يتوسع فالملك خير .

 وزيد قلك شرب كوكا لايت يا خويا خلي يشرب  ومطرح ما يسري يمري

إما هذي قلتلهم اسكتوا !!!!!!!
أخر حاجة طلع بيها الويكيليكس قال رئيسنا الغالي كبر شوية فالعمر وقعدوا يسهلوا زعمة ينجم يقوم بواجبات متاعو !!
وأنا من موقعي هذا أناشد الله أن يطيل في عمره و يكثر في أنفاسه ونشالله ربي يشدو بالصحة البدنية ويحلو كل ثنية
وكان لازم ناخذوا من عمرنا ونعطيوه فداءً للوطن .
وأخيراً لازمنا إنبخروا شوية بخور عربي ونفرقوا لوبان ذكر وزيد  نعلقوا حوتة كبيرة بش إنطيروا علينا العين  خاطر هاو طلعوا الناس الكل لاهين بينا.

أنا أناشد إذاً أنا موجود

كل واحد يناشد على طريقة متاعوا

إلي يرفع فالتحديات، إلي مصور فيديو، إلي عامل باج فالفايسبوك ....

اني زادة نحب ناشد على طريقتي و كما يقولوا الشنقة مع الجماعة خلاعة. 

أناشد وزارة التشغيل وأطالب بحقي وحق كل حامل لشهادة عليا فالحصول على خدمة شريفة

أناشد كل موظف في إدارة عمومية بش يقوم بالواجب متاعو

أناشد الأمن بش كي نبدى مروحة ما نبداش خايفة لا يخطفولي ساكي 

أناشد وأطالب وزارة التكنولوجيا بحقي في انترنات حرة من غير 404 not found

أناشد كل صحافي باش يكتب بحرية وموضوعية بش كي نحل جريدة تونسية نلقى ما نقرا بخلاف حظك اليوم وجرائم الأسبوع

أناشد كل إعلامي باش يعمل برنامج هادف ما فيشي لا إستغلال لمعانات العباد لا شطيح لا كرة

أناشد كل أستاذ باش يقوم بالواجب متاعو ويطلعوا أجيال مش مسطحة الفكر وفاقدة للهوية

أناشد باش كل واحد ياخو كان حقو وتتنحى الأكتاف والمحسوبيات

أناشد خاطرني نحب نعيش بقدري وكي نشكي ونطالب بحقي نلقى شكون يسمعني 

أناشد وأناشد وأناشد .........................

على قلبنا أحلى مل عسل

الناس الكل تقاسي مل كبير للصغير للي يندب عل حصير ؛ يا خويا واحد ملي يحل عينيه لين يكن راسو وهو يرفع فالتحديات اني وحدة مل ناس تعبت وكوارعي وجعوني وزيد وخيتك نبدى لابسة تالون ومل صباح للطياح واني نرفع ياسر عليا فديت  .

هوكيف إتجي تشوف الناس الكل فدت وملت ؛ بون الحق الحق مش الناس الكل الكل خاطر فما شعب تونس المختار ما فدوش من رفع التحديات خاطر هاذم ناس صحاح عندهم ما يقول في رواحهم .

ينجموا يبعثوا ولدهم للستاد يتفرج في الدربي ويعسو عليه 200 رقبة
ينجموا يسكروا على الرعاع لي كيفنا الهواء؛ الماء ؛ اليوتوب  ؛الدايلي موشن
ينجموا يربطولنا الربطة و يربطونا حتى احنا 
ينجموا زادة يغليوا فالخبز فالمازوت يقطعوا الحليب يوكلوك البخس و الهندي و الكاكتوس
هومة الفاتق الناطق واحنا لازم نسكتو ونحمدو ربي خاطر بربي الرعاع الي كيفنا منين يفهموا مصلحتهم وين !
تي هوما  على سبيل المثال خاطر سخفوا على الشباب الضايع من الرعاع لي كيفنا إلي ما يعرفش حتى يبحر في عالم الانترنات حطولنا واحد كفء بش يوجهنا وينورنا سي عمار بركالله فيه وفي مجهوداتو الجبارة .

وبالتالي يا رعاع تونس لازمكم تحمدوا ربي على مجهودات شعب تونس المختار لازمكم تشدو إمشومك لا يجيكم ما أشوم

خاطر القناعة كنز لا يفنى

خاطر الماء لي ماشي للسدرة زيتونة صخر أولى بيه

خاطر بالأمن والأمان يحيى هنا الإنسان 

وخاطر وخاطر وخاطر..............................

فهنيئاً لنا بكم يا شعب تونس المختار ؛ ميسالش نرفعوا التحديات ليلى نهار في  بلاصتكم وحتى كان تعبنا طز فينا تعبكم راحة وحتى كان عفستوا علينا ميسالش زادة على قلبنا أحلى مل عسل .