حكاية و وفات

يوفى الكلام ... نغزرلك في عينيك نتمنى روحي معاك حياتي الكل ... نتمنى كان الدنيا تاقف 

أما الدنيا ما وقفتش احنا لي وقفنا   ...

سهلتك وقتاش نسيت ... قتلي نسيت  لي أنا كنت نتفكر  .... 

تنسى روحك ساعات .....تنسى شنوا تحس وتنسى لي  حبيتو نهار مل نهارات ؟

ننساك إيه أنا تعبت ؛ تعبت مل حرمان ومل بعد ومل حب لي ما عندو وين يهز ...

كان الحب هاززنا.... حبينا  ووعدتني شبيك نسيت ؟

وعدتك و خلفت ما نجمش نوفي ما نجمش إنكمل 

علاش نسيت علاش وعدت وخليت ...  نسيت لي كان ... مش قتلي  لي ما بيناتنا ما يتنساش والمرا هاكي ما إنبدلهاش ؟

إيه نسيت ابعد عليا 

كي تنساني بش تنجم تعيش ... مش قتلي العيشة من غيري ما تجيش مش قتلي الدنيا من غيري ما تمشيش .....

في قلبي ما عادش عندك بلاصة نحب نرتاح وننسى ... ننسى وجهك ننسى لي انا عرفتك .... 

تنساني وانا كيفاش بش ننسى ... تنساني و كي انا ما نحبش ننسى 

نسيتك ! باش تفهم  ابعدني راني مازلت نحب نحلم ... 

هاني بش نبعد وننساك ..

 ننسى الأيام والمحبة وإلي كان ننسى روحي... ننسى لي كنت حياتي ننسى لي أنا بنيت معك حياتي ....   ننسى  لي نهار حبيتك وننسى أخر نهار قتلك فيه حبيتك ؛ بش ننساك وننسى الدنيا و لي فيها .. ننساها خاطر إنتي ما عادش فيها .....

انا قيدت وإنتي وقتاش بش اتقيد

  في يوم من أيام الصيف الحارقة ومع ال-10 متاع الصباح  و-44 سخانة  قمت بكل حزم بش نمشي إنقيد

بما إنو الوجهة إدارة تونسية وزيد الحال صيف ويكثر التكركير تسلحت بدبوسة ماء بو لترا ونص و وزوز حرابش راس وسرحت صوتي شوية بالكشي لازمني إنعيط ... الله أعلم بالظروف . 

شديت الكياس والبلدية قريبة حتى تكسي ما توصلش وليت مشيت على سويقاتي لين الشمس نقبتلي راسي . 

وصلت قدام البلدية وقبل ما ندخل قريت سورة الفاتحة والمعوذتين ... راهي إدارة تونسية وما أدراك !!

أية دخلت كل عادة فما صف والعون قاعد مقابلتو مروحة وعلى وجهه إبتسامة عريضة وعروقاتو هابطة شرتالله ...

فرحت أول مرة كيف ريت صف ... و قلت ما يطلعو كان جاو يقيدوا .... 

اني وقفة سهلت راجل : بربي خويا هوني يقيدوا ؟

-أختي كان عندك صغير بش تقيدوا راهو البيرو لي مقابل مش هوني

-لا مش بش إنقيد صغير بش إنقيد روحي فالإنتخابات 

-إما إنتخابات .... أسمع أختي برى أسهل العساس 

هزيت روحي وسهلت العساس : بربي وين يقيدو 

-هانو فالبيرو المقابل قد قد

- لا مش بش إنقيد صغير بش انقيد للإنتخابات

هزني وحطني نعرفو من قبل عرصة من عرص الشعبة فالحومة و نعرفو عساس من أول الدنيا ودارو عل ثاني

قالي : هانو فالبيرو على يدك اليسار 

أية دخلت فما كان رجل حاطط راديون ومروحة دور مقابل وجهو و  لا فما صف لا شي 

 قتلوا السلام 

ما جاوبنيش قالي : جبت بطاقات تعريفك 

- إيه جبت مال جاية بقدي 

كحرلي وخذاها من عندي .

 أيا قيدت وصححت وهو ساكت ما قالش حتى كلمة سهلني كان على الادريسة صحيحة وإلا لا

خرجت مل بيرو و أنا  أول مرة  في حياتي نتمنى انشد صف .

يوميات مرا تلوج على ولد الحلال

غزرلها قال في قلبوا هذي هي الطفلة لي إنلوج عليها وتنهد تنهيدة طويلة 

هي قعدت تهز فيه وتحط وما فهمت شي 

شد كاس القهوة و حمحم قتلوا أية احكيلي شنومة طموحاتك

فرح قالها : طموحاتي كبيرة ياسر 

تبسمت وقتلوا:  إيه احكيلي 

حط الكاس وقالها : نحب نلقى بنت الحلال ونعرس 

قتلوا : معقول إيه 

- نحب نشري دار زادة ما نحبش إنكمل فالكراء وسكت 

قتلوا : إيه كملي 

- أنا عندي توا كرهبة إما نحب إنبدلها وإنجيب زوز صغار ويزي 

قتلوا : وشنوا أخر 

قالها : شنوا تحب اخر 

- إنتي قتلي أحلامي كبيرة وطموحاتي أكبر تصورت عندك حاجة سبيسيال 

- إيه شوية عليك هذا ياخي إنت شنوا تحب يشريولك جزيرة في هاواي ؟ وطرشق بالضحك

هي تحكي بجدية ما فهمتش علاش يظحك قتلوا : علاش يا واحد يتقوقع في مثل هذه الصورة النمطية   متاع صغار ومرا ودار ملك واذا كان يحب يحلم ما ينجم يحلم كان بجزيرة في هاواي؟ 

هو ما فهمش ياسر الجملة إلي قالتها حب يبدل الجو : يتقوقع واللاهي فكرتني عند قداش شاهي الببوش  وبدا يظحك 

سكتت هي هزت كاس العصير شربت شوية وعاودة حطتو 

قتلوا:  باهي بش نسهلك حاجة أخرى ما عندكش  هوايات .... ما نعرفش أنا.. حاجات تعملهم كي تبدى ما تخدمش 
- إيه نحب جمع الطوابع البريدية وبدا يظحك 

هي ما عجبهاش التعليق وبدت تنفخ 

حب يصلح الغلطة : إنفدلك عليك واللاهي إنتبع شوية كورة سرتو كي تبدى الجمعية تكور وهانو شوية تلفزة انترنات وساعة ننفح بجرية عل بحر 

- ممممم باهي ما تقراش شوية كتب .

- هاكا توا بالطبيعة نقرا 

تبسمت شوية هي قتلوا : شنوا أخر كتاب قريتو 

- تي نسيت قريت ياسر كتب 

سكت وحب يبدل الموضوع نادى للسرفور : خويا بدل علينا هل جزيرة والكبي وفرانس 24 ؛ حط الميلودي شوية ريتم  

وجها صفار ما صدقتش ضربت بيدها عل طاولة .....
تلفت : تي بربي واحد تخنق يا خويا أنا السياسة مش متاعي ..... قالو إنتخاب وتكسير راس ... واحد كان رايض.... جاو ثورة وحرية ... شقالت عزيزتي  
- عزيزتك ؛ ما تحسش روحك تافه وما عندكش أهداف فالدنيا 
فما واحد ينسى لي ولاد بلادو ماتوا في جرت الحرية ؛ فما واحد بعقلو يحب يعيش وناس تسرق وتهين فيه ؛ فما واحد ما يحبش بلادو حرة و ديمقراطية ، فما واحد يحب يجب صغار  هو ويتفرج على الميلودي وروتانا ........... سامحني إما أفكارك ياسر سطحية ونضرتك للدنيا محدودة برشة ...
- تنرفز وقالها : حاسبة روحك تفهملها وأنتي ماكش فاهمة شي ؛ كان بش تكمل هاكا مش بش تعرس راهو....
- أنا ما نحبش شريك حياتي يربيلي ولادي على السطحية والجهل والأنانية  ......
- تي حتى لين تجيبهم إنت الصغار عل دزة هذي مش بش تلقى حتى رجل يلمك
- يلمني بربي !!!!!! زايد أنا الغالطة لي نحكي مع إنسان كيفك رجعي وأفكارو محدودة ..
- ونتي معقدة  حتى كان يزيودني الفلوس ما ناخدكش .........
وقامت وخلاتو ..... 

Moi sans toi

Je me trouves seule parfois  ; j'essaye de chercher quel qu'un pour me prendre dans ces bras en me rassurant que je suis bien aimée ; je cherches et je trouves personne ......

Une grande famille ; un copain  ; des collègues de travail ; des voisins des " amies " et pourtant je me sens seule .

Est ce que je suis déprimée ; malade ; schizophrénique est ce que c'est moi ou c'est eux ?

 Je pose des questions et je trouve jamais de réponses et du coup je me sens perdu à l’intérieur de moi  .

Je prends la route vers la maison ; je perds mes repères ; je regarde les visages des personnes dans la rue j'essaye d'imaginer leur problèmes et leur soucis et juste  pour un moment j'oublie les miens .

Je rentre en suite je regarde les  murs blanches si froides , si rigides si oubliés tout comme moi . Ensuite je respire  et j'utilise le reste de mon énergie pour aller au lit  ; je trouve aussi un lit froid vide et qui n'est même pas le mien .

Je pose ma tête et tout reviens me hanter et je me rappel quand  j’ai abandonné mon masque et voilà je suis devant lui je suis fondue dans ces yeux et j'ai décidé que je ne veux plus être forte et j'avoue mes faiblesses ; mes peurs mon insécurité et mes rêves impossibles J'avoue tout ; j'avoue que je suis cette personne complexe perdue . Je dis tout ce que j'ai voulu dire et  j'attends qu'il me prend dans ces bras ; j'attends qu'il me rassure 

et lui il prend ces valise et il part ........... Il est parti laissant son ombre ces souvenirs ces blessures ; il est parti et je suis restée .

Ensuite je me rends compte que je pense à lui donc  je ferme mes yeux je souhaite une bonne soirée à ma mère et j'essaye de dormir . 

خواطر إمرأة

كرهتك فحبك أعماني 

أصبحت كلما تنفست اختنقت تذكرت أيام العشق والنسيان

نظراتك قتلتني فمحيت كلماتك بكياني 

صرخت وناديت أنا إمرأةٌ 

فهل تعرف ما معنى أن تعيش إمرأةٌ فالحرمان ؟

عانقتني و وسرقنا القبل 

 فأنى  لي أن أنسى ذاك الزمان 

صغير أنت لازلت تريد جسداً  بدون  وجود انسان 

أعمى البصيرة فماذا تريد

تعال ومت بين أحضاني

كرهتك و اخترت نفسي

 فأمضي في طريق مشت عليه أقدامي

  

وداعاً يا من أحببت

وداعاً يا من من أجله  ودعت أحلامي .......

  

نداء مواطن غير صالح

أنا مواطن غير صالح ........

أنا مواطن دزني الحاكم وكلني الكف

عمري ما مشيت صوتت  و عمري ما خممت

أنا مواطن كان في بطاقة التعريف ......

أنا مواطن بكى على بلادو 

أنا مواطن تمنى الخير البلادو

أنا مواطن غير صالح ما سمعونيش كي اتكلمت وخافوا مني كيف كسرت .....

انا مواطن نلوج على خدمة 

أنا مواطن نحب بلادي كيف الوردة 

أنا مواطن والأمان عندي من غير حرية جحيم

والجحيم في بلادي عندي جنة

أنا مواطن نحب نحرق و نوكل دارنا الخبز

أن مواطن نحب نعيش صغاري

أنا مواطن غير صالح لزوني بش نقتل خواتي

أنا مواطن غير صالح ونحب نتصلح 

أنا مواطن حرموني من حقي بش انوكن مواطن لن انسيت شنوة معناها مواطن

أنا مواطن وعندي وطن .............

وطن ماتوا على خاطرو خواتي 

أنا مواطن غير صالح أنا تونسي ونحب بلادي

حيوط دارنا

حيوط فارقتهم و فارقوك

ما قعدلك شي كان الذكريات

حيوط كبروا معاك بكاو معاك و ضحكوا معاك

حيوط خلاو عليا بلاصة و كي إنراهم انشم ريحتك

حيوط بقاو و الحباب إمشاو

حيوط قعدولي كان هوما

حيوط قعدت نتفرج عليهم عل تصاور

حيوط كان ضيعت روحي ما انضيعهمش

حيوط يفكروك كل يوم لي ما عندك كان الحيوط

تمشي تهزك دزك الحيوط 

تبكي تشكي ما يسمعوك كان الحيوط

علاش يسمعوا فيك ؟

خاطرك وليت حيط مل حيوط

بارد ساكت هايم ……

حيوط بقاولي كان هوما يفكروك في أيام إمشات و ما عادش باش ترجع

توحشتكم يا حيوط دارنا توحشتك يا ……………